العين الحارة, أحـــــــــــــحححح

عنوان الموضوع مزعج و مقلق و معليش مرة يعع
و الناس ما نفسهم يوقفو كلام عن الناس التانيين. إيش الحكاية؟؟
أنا بصراحة ما ألوم الناس بصفة عامة. يعني خلينا نفكر في الموضوع

مسلاً نقول واحد بني آدم أشترى سيارة جديدة
فخمة و ممصخرة مرّة
يا الله ماني قادر إيش هادا يا ربي يعني
و الراجل دا يوم من الأيام ( غالبًا يكون أول أسبوع بعد ما أي أحد يشتري سيارة ) قرر إنّو يخرج يلفلف بسيارتو مع أصحابو و يتمشى معاهم على أساس إنّو يوريهم سيارتو و يفلّها معاهم و يسمع تباريكهم عليها. بس على خفيف يعني
خلينا نقول تلاتة أنفار معاه و راحو لفلفو شوية و أتعشو و رجعهم بيوتهم و الليلة أنتهت

اليوم التاني إتنين من الأصحاب هادول حيقعدوا يهرجو عن السيارة و مواصفاتها و قوتها و كم تكلف و الكلام الكتير دا

طيب

أنا ليّا تجربة شخصية مع إتنين شباب أصحابي سار معاهم نفس الشي دا و أنا كنت معاهم بعد ما رجعنا من الخرجة إللي مع صاحب السيارة إللي مليون دولار دي

صاحب السيارة مهو في و هادول بيهرجو و أنا قاعد أسمع و ألعب في جوالي و كأني ماني داري عن شي و كل ما يسألوني عن حاجة أقلّهم إيوة من جد, ياخي إنتا بني آدم ذكي, قلي بس من فين جبت الذكاء دا كلو؟
تعرفو الحماس اللطيف دا

حأتكلم عن الشخصين هادول بأشكالهم
( نديهم ألقاب جديدة بس عشان الموضوع )

الأول - قصير و شعرو منفوش بأجمل أشكال النفش حول العالم ( من جد كان شكلو جيد )
نسمّيه آفرو
له إسم تاني بس دحين حنسميه آفرو

التاني - أطول من الأول بشوية و شعرو منفوش نفس الحكاية بس على أقصر شوية و لونو بني
خلينا نسميه لباليبو عشان شفايفو كبيرة و بشرتو بيضة

بعضكم حيقول طب ليش ما سميتو براطيمو؟ الجواب إنو براطيمو يركب على بني آدم أسود و هادا الواد أبيض و شفايفو كبيرة زي السود فلباليبو يركب عليه أكتر.

لباليبو من كلمة

Lips

بالإنقليزي


و على فكرة ترى مافي عنصرية في الموضوع دا, الواد دا حبيبي و صاحبي من زمان و دايمًا نمزح بدا الأسلوب

المهم,
آفرو و لباليبو

آفرو قاعد على اليمين
و لباليبو على اليسار قدام
و أنا على اليسار ورا في تويوتا إكس إي سودا

Black Toyota XA

آفرو بعد ما ركب السيارة قعد ساكت يمكن خمسة ثواني و هوا يطالع تحت, و بعدين نقز فجأة و قعد يزعق على لباليبو و يقلو خلينا نرجع لصاحب السيارة و نخرج معاه مرة تانية
لباليبو قلو إشبك هيّا شغلة كل يوم و التاني رايحين و جيين على البني آدم عشان سيارتو؟
أهدا لا تنضرب

( كان الوضع مضحك )

فجأة أخد آفرو جوال لباليبو و دق على صاحب السيارة و حاول يخرج معاه بس كان مشغول و ما يقدر يخرج

آفرو دحين سار منرفز و يبغى يضرب أي أحد قدامو

لباليبو قفل, يبغى يفهم ليش آفرو منرفز و يبغى ينكد على خرجتنا
فقلو إيش بأهلك؟؟

( أحب الكلمة دي )
:]

قام آفرو قال, ياخي سيارتو جيدة
من فين جاب الفلوس دي كلها ماني عارف
‘ ول ‘

أنا في نفسي قلت السيارة راحت

لباليبو قلو طيب إيش تبغى مننا يعني؟ ليش ضروري نقعد نبكي و نزعق و نتنكد بس علشان ما عندنا سيارة زيو ولاّ ما قدرنا نخرج معاه اليوم؟
يعني ما نقدر نمبسط في الإكس إي؟
أفرض ما عندنا ولا سيارة
كيف كنا حنشوف بعض دحين؟

آفرو قعد يقلو, ياخي سيارة ماهو بني آدم طبيعي إللي يقدر يجيبها

لباليبو قلو, طيب مهي مشكلة
يومين و تسير زيها زي بقية السيارات و حينتهي عصرها و إنتا بنفسك حتكرهها

آفرو سكت شوية و بعدين بقرف قال ‘ ول ‘ مرة تانية

المهم
رحنا لفينا يمكن ساعتين و أتعشينا و خلاص راجعين بيت آفرو نتفرج أفلام

من غير مبالغة, في طريق الرجعة صدمنا صاحبنا المسكين بسيارتنا
المخيف إنّو سيارتو راحت فيها و سيارتنا ما سار فيها ولا شي

الحمد لله كل أصحابي من النوع إللي يمشي حالو مع المواقف دي و مافي مشاكل. الدنيا ما خلصت و لسّا أصحاب يعني
أنتهت المشكلة و صاحبنا بعد فترة أشترى سيارة جديدة و محد دري عن إللي كان آفرو يقولو في الإكس إي معايا أنا و لباليبو


الموضوع كلو عن كيف البني آدم لازم يفهم رخص و تفاهة الدنيا و إنو التبارك بالنعم ضروري
المفروض آفرو كان يقول في قلبو ما شاء الله تبارك الله على ما أعطى صاحبو من سيارة و إنّو قدر على الأقل يركبها

أتكلمنا أنا و لباليبو مع آفرو عن الموضوع و خلاص أستوعب الفكرة
الحمد لله

بس يعني في شي غريب ماني فاهمو إلى الآن
أنا و آفرو لمن نخرج في سيارة لوحدنا لازم تسرلنا مصيبة

أنا, أنفقع كفر سيارتي لمن كنت معاه يوم من الأيام في شارع التحلية
و يوم خرجت معاه في الصباح و خلصنا و رجعنا البيت و خلاص أنتهت الخرجة
بس في الليل رحت أبغا أخرج معاه مرة تانية و يسرلي حادث تاني جمب بيتو قبل ما أوصل
أخدت مخالفتين معاه
أتضاربت مع بشكة شباب في التحلية و هوا معايا
يوم من الأيام كنت راجع من بيتو و في الطريق وايت كان حيخش عليّا بس لحق نفسو و أنقذ حياتي و خش على سيارة تانية في مواقف قريبة من الطازج ( فروج فقيه المشوي ) و آثار الحادث إلى اليوم موجودة على الرصيف و جدار المبنى

كنت حأموت من وايت زي الوحوش دول

هوا, سيارتو سرلها حادث بالزبط قدام بيتي
يوم, كنت في الخالدية معاه و لمن خلصنا أكتشف الحلو إنو ناسي المفتاح جوا السيارة و الباب مقفول
و يوم كان يبغى يوريني محل السمك حق أخوه على الكورنيش و إحنا رايحين دق عليه أخوه و قلّو إنّو أنصرقت فلوس من المحل

أنا في أمريكا دحين و الله يستر إيش حيسير لمن أرجع جدة و أشوفو مرة تانية

هل عشان أنا فهّمتو إنو كلمة ‘ ول ‘ بطالة يسرلي كل دا معاه؟؟
يعني والله, أيام أفتكر سرنا لمن نخرج مع بعض نقعد خايفين من أي شي غلط يسير في أي لحظة
عينو بدل ما كانت حارة على العالم التانية سارت مفرزنة عليّا أنا
شي مو طبيعي؟

أنا أخويا نفس الحكاية كدا مع صاحبو
الله يعلم إيش الهرجة و إيش حلها

أتقوا شر العين و أتحصنوا و ما يحتاج تقولو ما شاء الله إزا ما تبغوا بس أهم شي تؤمنوا بيها في قلوبكم


..مسكين

[: