أوووووووووووووو

آااااااااااااااااااااااااااااااااااااااااااا

زي النــــــــاس, ألحق

زيّو يللاّ, خلاص لقيناه

النـــــــــــاس

إيش فهّمك في الناس

الناس هادول همّا كل شي في الدنيا

في الحياة

كل ما تسأل أي بني آدم عن أي حاجة لابسها ولاّ يمتلكها و ليش يمتلكها يقولّك:

عشان زي الناس

كدا الناس يسوّوا

كدا الناس تفكر



متال

الكلام

ضروري ضروري تتكلم زي الناس
الناس ما يتكلموا زي ما تتكلم

متال تاني

الأكل

أكل أوادم
(طبعًا ما أدري ليش هنا يقولوا أوادم)ـ

كمان متال

البيوت

بيوت الناس
خلينا نشتري بيت زي بيوت الناس


أنا نفسي أشوف الناس هادول
نفسي أشوف ناس لمرة وحدة في حياتي قبل ما أموت بس

يعني لو كانوا الناس بني آدم واحد كان العالم كلها شافتو

كل ما تخرج الشارع تلقى خمسمية بني آدم يتكلموا بطريقة و خمسة آلاف ياكلو نوع أكل و تمنطعش لابسين بطريقة و أربعة و تلاتين مليون يسكنوا في بيوت بطريقة

و الباقي كل مين بيسوي هرجتو بطريقتو اللطيفة


أيّت واحد أو وحدة إلّلي بيسوي أو بتسوي الهروج دي كلها بطريقة وحدة

إلّلي على روصنا طلعت طريقة الناس؟؟






MY ASS زي الناس







ليش ما أسوي الشي إلّلي أبغا أسويه بطريقتي


خلّينا نقول إنو على عام أربعة و عشرين ألف و تلتمية و إتنين و سبعين العالم كلّو أكتشف مين همّا الناس الصحيحين إلّلي مرة يا الله

الناس هادول ما أستخدمو طريقتهم؟؟

ليش همّا ناس و إحنا أي حاجة؟؟

في فرق بين ناس و بشر؟؟

ولاّ الكلمة أحلا يمكن؟؟

ألطف؟؟

أكتر سكسيّة؟؟

أسهل؟؟

أرجل؟؟

الناس هادول, ما كان المفروض يستخدموا طريقة الناس؟؟

و لاّ عشان همّا الناس خلاص؟؟






أي واحد يسوي أي حاجة بطريقتو يمشي عليها و أنتهينا






إزا عجبتك؟ أستخدمها أو أستخدميها

إزا أحّا؟؟ بلاشي منو


ولاّ؟؟



هل أعتبر قليل أدب أنا كدا؟؟
إزا قليل أدب ترا قولولي

أبغى أعرف
ضروري

ولاّ ما أسير زي الناس يمكن
هيّا بس بطلت

أهم شي الناس لا يتكلموا عليّا

MY ASS

العين الحارة, أحـــــــــــــحححح

عنوان الموضوع مزعج و مقلق و معليش مرة يعع
و الناس ما نفسهم يوقفو كلام عن الناس التانيين. إيش الحكاية؟؟
أنا بصراحة ما ألوم الناس بصفة عامة. يعني خلينا نفكر في الموضوع

مسلاً نقول واحد بني آدم أشترى سيارة جديدة
فخمة و ممصخرة مرّة
يا الله ماني قادر إيش هادا يا ربي يعني
و الراجل دا يوم من الأيام ( غالبًا يكون أول أسبوع بعد ما أي أحد يشتري سيارة ) قرر إنّو يخرج يلفلف بسيارتو مع أصحابو و يتمشى معاهم على أساس إنّو يوريهم سيارتو و يفلّها معاهم و يسمع تباريكهم عليها. بس على خفيف يعني
خلينا نقول تلاتة أنفار معاه و راحو لفلفو شوية و أتعشو و رجعهم بيوتهم و الليلة أنتهت

اليوم التاني إتنين من الأصحاب هادول حيقعدوا يهرجو عن السيارة و مواصفاتها و قوتها و كم تكلف و الكلام الكتير دا

طيب

أنا ليّا تجربة شخصية مع إتنين شباب أصحابي سار معاهم نفس الشي دا و أنا كنت معاهم بعد ما رجعنا من الخرجة إللي مع صاحب السيارة إللي مليون دولار دي

صاحب السيارة مهو في و هادول بيهرجو و أنا قاعد أسمع و ألعب في جوالي و كأني ماني داري عن شي و كل ما يسألوني عن حاجة أقلّهم إيوة من جد, ياخي إنتا بني آدم ذكي, قلي بس من فين جبت الذكاء دا كلو؟
تعرفو الحماس اللطيف دا

حأتكلم عن الشخصين هادول بأشكالهم
( نديهم ألقاب جديدة بس عشان الموضوع )

الأول - قصير و شعرو منفوش بأجمل أشكال النفش حول العالم ( من جد كان شكلو جيد )
نسمّيه آفرو
له إسم تاني بس دحين حنسميه آفرو

التاني - أطول من الأول بشوية و شعرو منفوش نفس الحكاية بس على أقصر شوية و لونو بني
خلينا نسميه لباليبو عشان شفايفو كبيرة و بشرتو بيضة

بعضكم حيقول طب ليش ما سميتو براطيمو؟ الجواب إنو براطيمو يركب على بني آدم أسود و هادا الواد أبيض و شفايفو كبيرة زي السود فلباليبو يركب عليه أكتر.

لباليبو من كلمة

Lips

بالإنقليزي


و على فكرة ترى مافي عنصرية في الموضوع دا, الواد دا حبيبي و صاحبي من زمان و دايمًا نمزح بدا الأسلوب

المهم,
آفرو و لباليبو

آفرو قاعد على اليمين
و لباليبو على اليسار قدام
و أنا على اليسار ورا في تويوتا إكس إي سودا

Black Toyota XA

آفرو بعد ما ركب السيارة قعد ساكت يمكن خمسة ثواني و هوا يطالع تحت, و بعدين نقز فجأة و قعد يزعق على لباليبو و يقلو خلينا نرجع لصاحب السيارة و نخرج معاه مرة تانية
لباليبو قلو إشبك هيّا شغلة كل يوم و التاني رايحين و جيين على البني آدم عشان سيارتو؟
أهدا لا تنضرب

( كان الوضع مضحك )

فجأة أخد آفرو جوال لباليبو و دق على صاحب السيارة و حاول يخرج معاه بس كان مشغول و ما يقدر يخرج

آفرو دحين سار منرفز و يبغى يضرب أي أحد قدامو

لباليبو قفل, يبغى يفهم ليش آفرو منرفز و يبغى ينكد على خرجتنا
فقلو إيش بأهلك؟؟

( أحب الكلمة دي )
:]

قام آفرو قال, ياخي سيارتو جيدة
من فين جاب الفلوس دي كلها ماني عارف
‘ ول ‘

أنا في نفسي قلت السيارة راحت

لباليبو قلو طيب إيش تبغى مننا يعني؟ ليش ضروري نقعد نبكي و نزعق و نتنكد بس علشان ما عندنا سيارة زيو ولاّ ما قدرنا نخرج معاه اليوم؟
يعني ما نقدر نمبسط في الإكس إي؟
أفرض ما عندنا ولا سيارة
كيف كنا حنشوف بعض دحين؟

آفرو قعد يقلو, ياخي سيارة ماهو بني آدم طبيعي إللي يقدر يجيبها

لباليبو قلو, طيب مهي مشكلة
يومين و تسير زيها زي بقية السيارات و حينتهي عصرها و إنتا بنفسك حتكرهها

آفرو سكت شوية و بعدين بقرف قال ‘ ول ‘ مرة تانية

المهم
رحنا لفينا يمكن ساعتين و أتعشينا و خلاص راجعين بيت آفرو نتفرج أفلام

من غير مبالغة, في طريق الرجعة صدمنا صاحبنا المسكين بسيارتنا
المخيف إنّو سيارتو راحت فيها و سيارتنا ما سار فيها ولا شي

الحمد لله كل أصحابي من النوع إللي يمشي حالو مع المواقف دي و مافي مشاكل. الدنيا ما خلصت و لسّا أصحاب يعني
أنتهت المشكلة و صاحبنا بعد فترة أشترى سيارة جديدة و محد دري عن إللي كان آفرو يقولو في الإكس إي معايا أنا و لباليبو


الموضوع كلو عن كيف البني آدم لازم يفهم رخص و تفاهة الدنيا و إنو التبارك بالنعم ضروري
المفروض آفرو كان يقول في قلبو ما شاء الله تبارك الله على ما أعطى صاحبو من سيارة و إنّو قدر على الأقل يركبها

أتكلمنا أنا و لباليبو مع آفرو عن الموضوع و خلاص أستوعب الفكرة
الحمد لله

بس يعني في شي غريب ماني فاهمو إلى الآن
أنا و آفرو لمن نخرج في سيارة لوحدنا لازم تسرلنا مصيبة

أنا, أنفقع كفر سيارتي لمن كنت معاه يوم من الأيام في شارع التحلية
و يوم خرجت معاه في الصباح و خلصنا و رجعنا البيت و خلاص أنتهت الخرجة
بس في الليل رحت أبغا أخرج معاه مرة تانية و يسرلي حادث تاني جمب بيتو قبل ما أوصل
أخدت مخالفتين معاه
أتضاربت مع بشكة شباب في التحلية و هوا معايا
يوم من الأيام كنت راجع من بيتو و في الطريق وايت كان حيخش عليّا بس لحق نفسو و أنقذ حياتي و خش على سيارة تانية في مواقف قريبة من الطازج ( فروج فقيه المشوي ) و آثار الحادث إلى اليوم موجودة على الرصيف و جدار المبنى

كنت حأموت من وايت زي الوحوش دول

هوا, سيارتو سرلها حادث بالزبط قدام بيتي
يوم, كنت في الخالدية معاه و لمن خلصنا أكتشف الحلو إنو ناسي المفتاح جوا السيارة و الباب مقفول
و يوم كان يبغى يوريني محل السمك حق أخوه على الكورنيش و إحنا رايحين دق عليه أخوه و قلّو إنّو أنصرقت فلوس من المحل

أنا في أمريكا دحين و الله يستر إيش حيسير لمن أرجع جدة و أشوفو مرة تانية

هل عشان أنا فهّمتو إنو كلمة ‘ ول ‘ بطالة يسرلي كل دا معاه؟؟
يعني والله, أيام أفتكر سرنا لمن نخرج مع بعض نقعد خايفين من أي شي غلط يسير في أي لحظة
عينو بدل ما كانت حارة على العالم التانية سارت مفرزنة عليّا أنا
شي مو طبيعي؟

أنا أخويا نفس الحكاية كدا مع صاحبو
الله يعلم إيش الهرجة و إيش حلها

أتقوا شر العين و أتحصنوا و ما يحتاج تقولو ما شاء الله إزا ما تبغوا بس أهم شي تؤمنوا بيها في قلوبكم


..مسكين

[:

مافي حدود

طول عمري نفسي أعرف إيش الطريقة إللي الناس هادول يسووا بيها هادي الأفلام.
كان في مسلل قديم ماني فاكر إسمو يجي على قناة شبكة الكارتون كامل بنفس الطريقة
Cartoon Network
كانت أحداثو كلها عن البنا و الزراعة و الشغلات دي
أحلا شي
مافي حدود

إيش حيسوي الضب في بطنو؟

!!طهمجة و كركبة و أي حاجة

حمزة بيت المال

أحد يدري عن صفحة عمي ولاّ أنا مرة قديم؟
لقيتها بالصدفة
في غيرها؟

شالوم | سالامو أليكوم | جيرو سلام | هير آي آم

أسمعوا الكلمات حقت الأغنية المحطوطة على الفيديو
أغنية رايقة و كلمات مافي ألطف منها

حماس الناس دول

ذير آي جو
There I Go!!

!!قلق زحمة السيارات - متعتي

آخر الليل وسط الزحمة, إيش المشكلة؟؟

كيف شعور البني آدم في وسط زحمة السيارات و خاصة لمن تكون تعبان؟
بصراحة, أنا شخصيا طبعي إني ما أزعل نفسي من أي حاجة. أصلا ما أحب أزعل من أساس الهرجة
يعني بالعربي لمن أكون تعبان و دوبني جي من مشوار متعب و مقلق و ألقى كل الشوارع قدامي سارت زحمة أعقد مع نفسي إتفاق فلة
أرجع المقعدة على ورا و أروق و أرفع صوت الأغاني و أحط يدين على الدركسون من تحت
كلا'''''''''م
أصلاً الجلسة لحالها فلة
خاصةً في السيارات لمن تحس بالسيارة تتحرك زي ما إنتا تبغا و بالذات إنو لف الدركسون ما يحتاج إلا حركة بسيطة مع سرعة هادية!! إيش من حماس يجيك يا راجل
بكل صراحة أنا من أجمل الأوقات إللي مضيتها في حياتي كانت في السيارة و خاصة في جدة في طريق المدينة بعد حراء إلين الرحيلي و بعدين طريق الرجعة نفس الحكاية
الروقان يجي من الأغاني و أنا ماشي ستين و الناس و العالم تعدي من جمبك و ما هي دارية عن شي
مساكين

في كتير ما صدقوني لمن قلتلهم دا الشي عن نفسي, وقت ما أطفش كان الوضع دا في السيارة حل كبير و مفتاح للإسترخاء بالنسبة ليّا
طبعاً عندي أشياء كتيرة تانية تروقني بس هادي من أكبرهم و ليست الأعظم

أنا هنا في أمريكا ما بأسوق سيارة, أول شي عشان ما عندي وحدة (غالين شوية و بأجمع فلوس) و تاني شي ما أحتاجها لأنو في باصات نضيفة (يا عيني على الحافلات حقت "توقف متكرر") و تالت شي بالله من إيش حأطفش؟؟
الحمد لله فاللها و لسّا حأفلها أكتر

ما زلت أبغى سيارة أعيش فيها غير البيت للتغيير المستمر
أنا من عشاق السيارات القديمة و بالصدفة حتى الأغاني, أحب أغاني الصخر الحديدي التقيل
Heavy Metal Rock
و سياراتي المفضلة كلها قديمة و مليانة حديد تقيل
بونتياك جي تي أو
1971 - 1968 Pontiac GTO
و جي إم سي يوكون جي تي
1996 GMC Yukon GT
كلام كتير

الشي العفن الوحيد في دا الموضوع إني أحزن على البنات في السعودية ما يقدرو يسوقو إلى يومنا دا و في نفس الوقت ينقهرو من أخوانهم كل يوم يخرجو يفلوها بسياراتهم و يسيبوهم في البيت مساكين فلتهم لوكل
Local Fun
بيتك بيتك يعني

أنا بعض الأحيان أخرج مع أختي عشان أرفهها شوية من الغم إللي هيّا عايشة فيه في البيت و نفس الشي مع أمي حبيبتي
شي أكيد لازم ما أرتاح لمن أخرج معاهم عشان مافي أغاني بس دايمًا أحاول أستحمل و نفس الشي لمن أكون ما أبغا أخرج و همّا يقعدو يزنّو عليّا خرجنا خرجنا
بعض الأحيان يقعدوبها المساكين و أسيبهم, المشكلة ما يدروا إني ما أبغا بس عشني طفشان مو عشان شي

يجي يوم يا رب و الحريم يسوقو إن شاء الله

المهم, هل أعتبر مختل عقليًا بأنو الشي إللي يمتعني هوّا نفس الشي إللي ينكد على بقية العالم؟

يعني هل قيادة السيارة و إستمتاعي بيها تخليني بني آدم غريب و مرة يا لطيف؟

ترا روقان مافي بعدو

منظر لمبات السيارات من ورا في الليل من أجمل ما شاهدت في حياتي

المواضيع و الصور مخيفة

تغطية خاصة: صور العام 2006
العالم 2006

المصور بصراحة تمام, معليش برة الموضوع شوية بس ضروري

!!أتحداكم

!أتحداكم تلقوا مدونة زي مدونتي
تقدروا؟
أنا أنمار!
إن شاء الله تعجبكم المدونة كدا ولاّ كدا
المهم, هدا أول موضوع بس كدا دحرجة
يجيكم الكلام الكتير بعد فترة
كتر الكلام؟ طيب خلاص
سلامي عليكم